يا تنح

كنت على موعد البارح مع ضيف غثيث زارني من غير سابق معرفة ولا تلوموني لانكم لو عرفتوه بتقدرون سبب كرهي له واكيد انه زار بعضكم ونفس الشيء تكرهونه .

ضيفي كان التناحه وهي وصف لحاله تصيب الدماغ بشلل جزئي يؤدي الى قصور في وظائف اعضاء وحواس الجسم وتجعلك تكثر من كلمة هااه ولا وش تقول ولا ما فهمت ، وهذي التناحه لو زارتني مره في السنة يمكن اتقبلها واعتبرها إجازة مدفوعة الاجر لدماغي لاني بصراحة شخص مفتري ولا اعطي اجازات لدماغي ، ولكن فيه اشخاص متنحين على طول الخط وهذول المتنحين يصعب التعامل معهم ويمكن يكون التعامل مع شمبازي آسيوي ارحم واصرف .

مدري للحين التناحه هل هي عيب خلقي او مرض ناتج عن الاصابه بفايروس معين لاني اتمنى ايجاد علاج خصوصا انه انتشر هاليومين و اتمنى البحث عن هذه الظاهرة وتفسير الاصابه بها ، لانها معضله وياليت وزارة الصحه تفتح عيادات لمكافحة التناحه اسوة بمكافحة التدخين ويعالجون هالمتنحين _تروح للمستشفى وتلقي واحد في صاله الانتظار وتسولف معه وش عندك عسى ما شر ؟ يقول : فيني تناحه وابشرك على علاج :) _ وياليت اذا لقوا علاج يكون على صورة بخاخ يستنشق من الانف وريحته زينه عشان اذا صادفت متنح ابخ جنبه بختين ويصحى من التتنيييح . لان متعاطين التناحه ما يحبون العلاج فلازم نسوي معهم شوية حيل علاجيه .

ومما عانيته البارح من التناحه وانا مسنتر على الكمبيوتر خلاني اتخيل اني صرت اثنين واحد متنح وواحد صاحي وقمت اهذر معه بأبيات شرايكم تتنحوا وتقرونها :

يا تنح لك غلا ماله وصووف

والسبب ماهو قليبك!! تناحتك

تناحتك تخلي الواحد يشووف

شاشة جهازه كنّها شاشتك

قلي اهي دايم تجيك ولا ظرووف

ولا قديمه من يوم امك جابتك

تقول هااه يا تنح زهقتني اووف

جاوب حسبي الله على دلاختك

ولا اقول اقلع وفارق ما بي اشووف

خشتك يا تنح وقفل الباب بساقتك

وابشركم ما طول الضيف علمي به صاحي ويردد الابيات يبي يحفظها ويوم قمت من النوم لقيته سمع الكلام!!! وخذ الباب بساقته :)