من قدرك بالدعوة فعزه بالمجيء

هذا هو ما لم اجد بد من فعله عندما وجهت لي دعوة خاصة وغالية بنفس الوقت لزيارة قطر الجميلة...التي تفاجئت برؤيتها فعلاُ ..

كانت زيارة سريعة وليوم واحد بدأت صباح يوم الاثنين 27 ابريل 2009 عبر منفذ السلوى <<طبعا الحبيب يعشق سفر البر والحمد لله ما كان فيه زحمة في المنفذ خلصت في اقل من ربع ساعة ومسكت الخط السريع اللي ما فيه كميرا رادار الاّ وصورتني ^_^ وفي اثناء سيري جائتني رسالة من المعزب يقول غرفتك محجوزة في فندق الريتز كالرتون الدوحه وطلاقي بالثلاث ما تدفع ريااال وبما أن ابغض الحلال عند الله الطلاق فوافقت *_^

بس كان موعد الدخول الساعة 3 العصر فأقترح علي ان آخذ لفة في السنتر ستي لحد ما تجي 3 ومع اني اكره المولات ما لقيت قدامي الا اقبل اقتراحه خصوصا ان الدنيا كانت حر شوي فتوجهت للسنتر ستي ودخلته....

وتقهويت في ستار بكس وبعدها لفت انتباهي صاله التزلج اللي في بهو المول وبغيت انقز فيها بس تذكرت اني لابس زبيريه وهي تزحلق بي على طول الخط فأكتفيت بالزحلقة المجانية ^_^ بعدها توجهت صوب السينما بس تدرون لازم الواحد يعبي الكرشة قبل ما يخش السينما وانا على لحم بطني فضربت ذيك الغدوة اللي يحبها قلبكم ودخلت السنما واخترت الفلم اللي جاهز للعرض وكان4 FAST & FURIOUS قلت يلا مش بطّال خشيت الصاله وعينك ما تشوف إلا النووور انواع التقحيص اذني صاحت على وقالت : ياخي وش مسوية لك قلت : اهجدي لا افركك ، قالت : طيب

السلم هذا تمنيت فيصل معي العبه عليه <<<بدوي

بعدها ناظرت للساعة ولقيتها حول 3 وناظرت لثوبي وحالتي لقيتها تقول : لبيه يالدش والنظافة فقلت : ابشري الحين انقز للريتز كالرتون ولا يصير خاطرك إلاّ طيب وفعلاُ توجهت تلبية لها وبمعاونة من معزبي اللي كان على التلفون معي لحظة بلحظة ودلني للفندق لين خشيته وطبعاُ وش اول شيء يسويه واحد جاي من السفر ويخش لفندق ؟ اكيد يقشع هدومه ويتوجه للبانيو ...خذت ذاك الدش اللي روقني وعطاني انتعاش ولبست وخرجت من الفندق وتوجهت للكورنيش...ويا زينه من كورنيش رايق بصراحه واهل قطر اتوقع كلهم عليه..

يا زين الاشارات

طبعا لو لا الله ثم اقتراحات وتوجيهات معزبي كان توهقت.... فعلاُ ما قصّر وياي ...اقترح مجددا ان اروح لسوق واقف وهو عبارة عن سوق شعبي تصميمه فريد من نوعه وقديم يذكرني بالعهد العثماني ، يضم فيه اسواق شعبية ومقاهي ومطاعم ما ودك تطلع منه ابد ابد فقبل المغرب توجهت له وركنت سيارتي بعد ما دخت السبع دوخات على موقف ورحت لمقهى وطلعت للدور الثاني وقعدت وطلبت لي قهوة وجلست اناظر الكورنيش اللي يطل عليه وانا ظر العالم اللي مثل النمل من كثرهم بصراحه كانت الجلسة آآآخر روقان خصوصا اني قمت اسولف مع الناس اللي في المقهى واهم واحد العامل المصري دمه شربات وخلاني عشان دمه الشربات انق 200 ريال من غير ما احس ...

هذا عسكري ذكرني بجنود الحرس الوطني ^_^

هذي نوعية المقاهي في سوق واقف
إلاّ ليش سموه سوق واقف ؟؟!!!

في المساء منظر السوق روعه

خرجت من السوق على العشاء وتوجهت لفيلاجو واللي ما يعرفه هو سوق من طابق واحد فيه محلات من ارقى الماركات ويمر فيه بحيره اصطناعية وسقفه مغطى وملون بلون السماء الزرقاء والسحب البيضاء بصراحه تدخله تنسى نفسك<<<وصف دقيق بسم الله علي وكعادتي اول ما اخش مول وهي قليله افر فره سريعة واصفط في ازين كوفي وبعدها ابدأ في التخطيط وش اسوي في المول ..صفطت في كوفي <<<تريلا مو آدمي وناظر يمين الا فيه محل ملابس اطفال ما اذكر اسمه قلت: وجبت يستاهل فيصل وانقز له وادوخ العامل معي نزل نصف الملابس عشاني ..اشتريت كم طقم لفلذة كبدي <<يا حبي لهالجملة ورجعت مرة ثانية للكوفي وخلال جلستي فيه جاني المعزب ولا طول عندي لإنشغاله <<حشى وزير الداخلية ...بعدها رحت لمطعم آشاز الهندي وكسعودي طلبت برياني وآيس تي بفاكهة الباشن والزنجبيل << ابوك يالمزاج والحطها في دقايق ومن قوة حرارة البرياني طلبت آيس كريم وقمت ابرد لساني به وبعدها طلعت ...

بعدها توجهت لحديقة اسباير زون وهي ملاصقة للفيلاجو والاستاد اللي اقيمت فيه اولمبياد قطر مدري كم ^_^ وهي حديقة عامة يغطيها الثيل ومزينة بالاشجار اللي نقلت من انحاء العالم وفيها بحيره كبيرة يتوسطها جسر ونافورة ..الحديقة غطت على الهايد بارك لا جمالاُ ولا تنظيماُ ولا عناية مزوده بارصفة للمشي وملاعب بجد مبهرة و في المساء عالم ثاني تلاقي اضاءة خافته تعطيك جو رومانسي <<يا كثر بربرتك هات الصور

بعد اللفه هذي كلها اللي انتهت 11 بالليل صرت ادور للفراش رجعت للفندق وطقطقت شوية عالنت وخمدتها نومه ما وعيت الاّ الساعة 5 الصبح <<ايام الدوام اقوم بمطااقة الساعة 8 ثم قمت واخذت دش وكشخت وتوجهت لمطعم الفندق افطر ...

بعدها عطيتك للفندق وحديقته نظرة المسافر ورجعت للغرفة ولميت قشي استعداداُ للتشيك آوت و خرجت من الفندق وانا حزين *_*

وبعدها جا في نفسي فنجال قهوة في الفيلاجو ورحت له وتقهويت وسولفت مع واحد لقيته هناك وطلعت ومريت بعدها الاسباير زون ونظرة وداع برضو ومشيت وحسيت ان وجهي خفيف اثاريني نسيت نظارتي في الكوفي لكن فدا لقطر ...مشيت الطريق وانا خطوة قدام وعشر ورا ما ودي اروح لكن الجايات أكثر ...

أخيراُ كلمة شكر لمعزبي وياليت يشرفني بزيارته للسعودية واكأفيء احسانه واقوله فديتك يا غناتي .

ملاحظة : انا صورت بكميرا الجوال ولكن جودتها مو لهناك ففضلت ان استعين بصور من النت .

اكتشفتك... but please don't put full stop now

غريزة إكتشاف المجهول لدى الانسان هي ما يفتح له آفاق جديدة على جميع الاصعدة .

فعندما اكتشف كريستوفر كولومبوس القارة الامريكية_ مع تشكيكي لأسبقيته_ فتح للعالم أرض جديدة بسكانها بمعالمها وتضاريسها وحتى بالكائنات الحية عليها ..فتح اقتصاداً وابواب زرق لمن قصدها...فتح ايضاً ابواب الظلم والاستبداد والتمييز العرقي والعنصري الذي مورس هناك ابتداءاً من الهنود الحمر للزنوج والذي امتد حتى عهد قريب .

ومن خلال هذا الاكتشاف نرى أن معايير قياس أهمية اي اكتشاف تختلف فهناك معيار الرضى ويتضح في فرح المهاجرين لهذه القارة.... وحنق وغضب مواطنيها الذين لا يرونهم إلا غزاة معتدين ... ومعيار العدالة فالسكان الاصليون يرون هذا الاكتشاف اكتساح واعتداء على خصوصيتهم وطمس لتاريخهم وحضارتهم و المهاجرين يرونه إنتشال لجهل هذه القارة وفرصة للنهوض بها لمصاف الدول التي سبقتها ....

لقد شطح بي التفكير في مصطلح الاكتشاف لأمور بعيدة كأكتشاف كولومبوس متناسياً أنني اكتشف يوميا فيّ امورغيبت عني لكثير من الوقت وأظنكم مثلي أيضاً...

اكتشفت أن لدي صفة حسنة لم أكن اعلم عنها...لم اكتشفها أنا حقيقة...بل نبهني لها من اصدقه، وحينما اتأمل نفسي أجده محقا فأتفاخر بها .

ونفس الشخص أيضا ينبهني لصفة سيئة فأوطأطي رأسي خجلا من الله ثم من نفسي .

اكتشفت انني اسلك الطريق الخاطئ الذي طالما ظننته صحيحاً ...هل هو الشعور بالكمال البشري!!!

كنت اضحك والناس من حولي يبكون واكتشفت أنني من يبكي وهم يقهقهون عليّا ضحكاً ....ربما لعدم وجود مرآة لدي!!

اكتشفت أن انقطاعي عن شخص لمدة وجيزة ليس إلا صقلٌٌ لمشاعري الخفية تجاهه والتي لم أجد الجراءة لبوحها له ...ربما لأن ابجدياتي ليس لبوح المشاعر فيها موضع قدم ..وربما لخشيتي من عدم تقبله لبوحي ذلك ووضعه Full Stop لما هو أكبر من مشاعري...

لذا فإن بعض الاكتشافات لأهميتها .. تتطلب روية وصبر، وحكمة ونظر، وحساب للخطوات وعقلية محترف لعبة شطرنج حتى لا يقال في نهاية المطاف لما اكتشفته كش ملك راحت عليك ..

اثنين في واحد/ة

مصطلح دعائي انتشر مع بزوغ شامبو هيد آند شولدرز مقروناً بخشة عمرو دياب أيام الفقر وهو شغال (موديلز رجالي )..فتهافتنا لشراء الشامبو ظناً منّا أنه الحل الجذري لقشرة وصلع روؤسنا مع أن العطّار لا يصلح ما افسدته الوراثة والموية المالحة .

وهذا المصطلح في وقته وحتى الآن اصبح وصفاً لمن يضرب عصفورين بحصاة واحدة ولا اجد له من المسميات إلاّ (ضربة معلم ) فكثير منّا سذج ينساقون وراء الاعلانات ويصدقون ما جاء فيها ويتهافتون لشراء أي منتج ليس له من المقومات إلاّ اعلان جذاب بمصطلحات جذابة منتقاة بعناية او إعلان يؤديه شخصية معروفة لا سيما إن كان من الجنس العجرمي أو نظيره الوهبي .

من بعد إنطلاقة هذا المصطلح وحتى الآن ونحن نستخدمه في شتى امور حياتنا حتى وصل الحال بأحد الشيبان اللي مخهم تجاري بس مصدّي أن زوّج ابنته لزوجين في آن واحد كاشطاً من هذا وذاك عشرات الالوف كما جاء في صحيفة الوطن في عددها 3109 الصادر اليوم السبت 8-4.

قد يكون هذا الشايب هو أول من ادخل تاء التأنيث على هذا المصطلح الاعلاني وله قدم السبق، متذاكياً بزعمه على نظام حقوق الملكية الفكرية والاعلانية ، فتاء التأنيث اللي (بعزق بكرامتها الارض) ابعدت عنه شبح الملاحقات القانونية للإستخدام الغير قانوني للمصطلح الدعائي ناسياً أو متناسياً شبح الملاحقات الشرعية والعقلية والعرفية للزوجين أو التيسين إن صح التعبير .

فهنيئاً للأب الجشع دخول موسوعة جينس كأول من أدخل تاء التأنيث على ( أثنين في واحد/ة) وهنيئاً له ايضاً السياط الاربعون والمائة والثمانون يوماً في غياهب ابو زعبل .