فعلاً والدي تاجر وامواله اكثر من جيرانه ... وفعلاً جاره القطري يحب ولده لدرجة انه اشترى له الجيب اللكزس وزوّجه وبنى له فيلا وينثر له الريالات نثر ... وفعلاً جاره الاماراتي يحب ولده واشترى له البي ام وزوّجه وبنى له فيلا ونثر له الدراهم نثر .... وفعلاً والدي ينفق بسخاء على جارته اللبنانية وجارته الاردنية وجارته المغربية عطفاً طبعاً وليس طمعاً بجمالهن ... وفعلاً والدي عطاني الخمسة ريال اللي ذكرت وسلفني مهر زواجي وراح يطالبني به عشان يزوج اخواني الباقين .
ولكن يا استاذ محمد الرطيان والدي ما حرمني لأنّه ما يحبني ولا حرمني لأنّه بخيل ... لالالا والدي اكبر من كذا ، والدي شفته انا وانت وهو يفر برجله وسط البيوت المعدمة ... والدي شفته انا وانت وهو يمسح دموعه اللي نزلت من عطفه على عياله ... والدي مدت يمينه تعيّش دول ... والدي راعي الدين ونصرة الاسلام وراعي الفزعة ... والدي عزني بين جيراني ... والدي بيته ملفى للضيف والخايف ... والدي راعي النهضة والحضارة ... والدي راعي الحكمة والرأي السديد .
تدري يا استاذ محمد .. ان كان تفسير المحبة عندك بالعطى وبـ الكم فلا اعتقد انك بيوم من الايام راح تحب والدك لأنه مهما عطاك ما اقتنعت وهذي صفة غالبية البشر ما يملاْ عيونهم إلاّ التراب للأسف وآمل منك تجربتها مع ولدك وبتشوف بعينك تصرفاته معك يوم تحرمه ، واكثر من كذا ما راح يزيدك الكم اللي تتمناه إلاّ دمار على اسرتك والتاريخ يعيد نفسه وابحث فيمن زادت عليهم الدنيا وش نهايتهم وايضاً كذلك العطى عندك ملموس (قريشات) وتنسى الله يصلحك الجانب المحسوس (خدمات ) .
عزيزي : والدي حتى لو ما عطاني احبه ...حتى لو صفعني ولو دعس على رقبتي والله احبه تدري ليش ؟ لأنه ابوي وتاج راسي ومحبته مرضاة الله .
عزيزي : ما تدري اني ومالي وحلالي لأبوي !!
عزيزي : انا محتاج لحب ابوي محتاج لاهتمامه محتاج لذراه يحميني من كل شر بعد الله .
زله لسانك قوية يالرطيان
زله ولا هي بأيات زله
ما هوب كذا نقارن الجيران
لله ماهيب كذا أي بالله
صحيح ان مركبي ددسن وهو كيان
وبيتي صفيح وهو مسكنه فله
وصحيح اني اتلطم من الديّان
وهو من الطنخه يحاسب عن الشله
وصحيح اني اعرس وانا حفيان
المهر نصفين: دين و من قطة الحله
وجاري معاد إلاّ يصرفون له ورعان
من زود ماهم بالكفيا موفرين له
لكن وقف هنا وراقب دورة الاكوان
وش بيصير اذا عطاك انقطع كله
بيثور من قطعته بمدك يا كحيلان
و بتلعن ويدعي عليك بكل عله
لان حبهم لك مشري بارخص الاثمان
ما سيق فيه لك وفا و ولاء لله
انتهى
المشاركات
