احترت بين حافي ولاّ جزمه أم ربااط

تحذير : كل ما يرد في هذا المقال يعتبر خاص فيني تشابيهاً وامثالاً وعبارات فلا قيود ولا محاذير ولا اعتبارات اخلاقية معي نفسي .

الصدر وما ادراك مالصدر، الصدر الحنون هذي الأم و الصدر الكتوم هذا الصاحب الصادق و الصدر الوسيع هذا من اعطاه الله قدرة عجيبة على التحمل في زمن لا يحتمل والصدر الضايق هذا... ؟؟الله يعينه ما يحتاج اقول من لانه كثير في ايامنا وصدر تلف فيه تريله....وهذا يا حليله مب عايش الا هو ....الخ

جمل تعودنا سماعها بين الفينة والاخرى لكل منها مدلول واضح وكلها اوصاف لـ 40 في 40سم من الجسد (طبعا اتكلم عن نفسي..فيه ناس ما يجي 20 في 20سم )هذا الجزء من الجسد ربي عطاه قدرة على التأقلم بحسب حالة الانسان مثل ما قلت سابقاً من جمل .

انا وكعاداتي اللي ما تجيني اللي بتوالي الليل حسيت ان صدري جزمة(اقرأ التحذير) ولا جزمة أم ربااط كأن واحد متعافي شادها بما اعطاه ربي من قوة لين ما صاح لسان الجزمة بس بموووت تكفى ..ومن زود لعانة هالمتعافي طق عليها بقفل انقليزي تحسباً لأي محاولة انقلاب توسيعية.

هو صحيح الوضع هذا ما يطول ...بس يا كثر ما يجي... حالي حال ثلاثة ارباع سكان العالم لامن غشاهم الليل وصار كلن يقلب راسه يبي النوم (بتقولون من وين جايب هالاحصائية بقول اقرأوا التحذير ولا يكثر...) تعودت عليه مع انه مطفشني وصرت اتفنن في المراوغة والتحايل على هالجزمة (اصصص ناظر فوق)ساعة اروح لطعس واقعد لحالي (بما ان الانهار نشفت من المملكة و بشرتي يتعبها جو فينا) وساعة انام وهذي اسهل طريقة وساعة اشوف لي خايب رجا ويشكي لي واشكي له ..وهم زي شبكة موبايلي لما تعوزهم ما تلقاااهم!!! ..وساعة وضوء و ركعتين تفل الربااط وتكسر قفله .

ولما تطلع على شمس النهار واسمع اصوات طلابة رزق ربي تغرد ...ما كن فيه جزمة ولا هم يحزنون!!!

حااافي ...حافي!!

تسطع حينئذٍ <<متعوب عليها فوق راسي المثلث لمبة شكبرها وبالونه فيها سؤال تعجبي !! ما ينفع تعيش حافي وتترك عنك الجزم وضيقتها؟؟!!

احترت فعلا في الاجابة!!

وجا وقت الصلاة وخلع الجزم لمقابلة مفرج الصدور فارج الكربات...

اصبحنا واصبح الملك لله.