أنا وانتو ثلاثة

البارح بس عرفت اني مسكون وملبووس بس مو من جني ومو من واحد بإثنين بعد!!!

وعرفت هذا بالصدفه المحضه أكيد تبون تعرفون شلون وكيف صار ها اللبس أنا اقولكم :

أكيد كل واحد منّا ربي متعه بعينين يبصر بها وكثير منّا يعرف ان مهمة العيون هي النظر فقط ولكن محسوبكم اكتشف مميزات غير في هالعيون غير النظر .

اكتشفت ان العيون تتكلم و تحس بالاضافه للنظر !!!ايه تتكلم ومعها لسان وتحس ومعها قلب يعني زيها زيّنا بالمختصر إنسان جوا انسان .

تتكلم ولسانها الدموع اللغة الوحيده اللي تتشاركها ملايين العيون الاسود والابيض العربي والاعجمي فيصير لك موقف محزن فتتكلم عيونك بدموع ، تفرح برضو فتخرج العيون من صمتها بدموع احياناً .

تحس ولها قلب يجري فيه دم ماسي اللون والقيمة إذا نزف دمها تعرف انه ما نزف إلاّ لغالي وزي ما تكرم الغالي بأغلى ما عندك فإنها تكرمه بدمها الماسي.

قبل فتره عانيت من كثر كلام ومحاسيس (احب اكتبها كذا لغرض في نفسي)هالعينين ففي المواقف المحزنه كانت هي أول من يقدم لي العزاء وتونسني في محنتي فأجللت لها هذا الموقف النبيل بمسحها بشماغي البسام (صار عجلان واخوانه) لكونها قامت بما لم يقم به غيرها ممن حولي .

وبالامس القريب تعرضت لموقف مفرح كان للعينان كلمة ومحاسيس ( نفس الشيء لغرض في نفسي )ايضاً فتعجبت من هاتان العينان وبان لي صدق صحبتهما لي وعرفت انني احمل في رأسي أغلى صديقين مرا عليّ في حياتي وعشان كذا لا تستغربوا لو شفتوني احلف زي المصريين _وحياة عينيّا_ لاني صادق وحلفت بغالي .

وقبل ما اختم خربشتي هذي اعتقد بأن اكتشافي اهم مما اكتشفه الدلخ داروين (الله يخسه ولاّ حنّا قرود الاصل والمنشأ) وآمل ان يسجل باسمي وألاّ اجده بأسم دلخ اجنبي لأن حقوق الاكتشاف محفوظة ومافيه مانع يلطشها عربي بس عشان الحلال والحرام يسمونها نظرية( أنا وانتو ثلاثة )!!!