قلبي تولّع بالرياض

ياني احبك يالرياض ... ياني اعشق امسياتك...لكن حرك جلغ ظهري وعجك ضيّق صدري.

اغيب عنك لفترة طويلة ...وارجع وكلي لهفة ومن يوم ينفتح باب مطار الملك خالد ويصفق خشتي ذيك السموم خاصةً ما بعد الظهر تحس ان ودك ترجع لداخل المطار :D ... وتقلبها تأمل في النافورة اللي داخل المطار وكوب كابتشينو بارد :) ( مدري ليش ما ينظفون مويتها ...!!!! ).
لكن الحل عندي .... وانا اللي بنفذه بس وفروا لي اللي اطلبه >>> اللي يسمعك يقول ان مجلس الوزراء قاعد يطالعك.
اكيد بتقولون ok لأنكم مليتوا من العيشة تحت المكيفات ونفسكم تتمشون على رجولكم في شوارع الرياض (اللي ما شاء الله ما فيها ولا حفرة) و لاّ تستمتعون بحدائقها اللي وصل عددها بفضل الله لمليون حديقة ... وعشان ما اطول عليكم هذي طلباتي :
1_ميزانية مفتوحة ( البترول طاير ولا احد يقول ما فيه ) وعشان ما يقول البعض يمكن تشيل هالدراهم وتطير ... كلفوا اي جهة رقابية من اللي عندنا وياكثرها تراقب مصروفاتي ( للمعلومية ترى عندي كم مليون قبل المشروع هذا :)
2_ يطلع د غازي القصيبي من دماغي ولا يشغلني ترى بجيب اللي ابي من الفنيين وبأي عدد ولا يقول لي سعودة بلا بطيخ مبسمر >>اموت يالشامي ... ولا يهون عمنا زينل لا يدوخ رأسي بتعاقد مع أي شركة من الخارج ولا يفتح لي سيرة الخصخصة ولا تسجيل وهيك حكايات معته >يا الله شويتين وتلقوني فباب الحارة .
3_تحديد مساحة في منطقة الرياض لا تزيد عن 2500 كلم مربع لأنفذ عليها مشروعي الحلم .

ويش سمعت ؟؟
طلباتي اوامر ....
اذا فلنبدأ:
راح اسافر في البداية لبعض الدول المتقدمة صناعياً واتعاقد مع عدد كبير من الشركات التي تستطيع ان تغطي المساحة المحددة بغطاء زجاجي عازل للحرارة والرطوبة ولدخول الهواء الخارجي >>بالمختصر محمية اواااادم .
راح اجعل هذه المحمية تعمل اليكترونياً بما يوافق تصويتكم على موقع محمية الرياض على الرابط : www.ma7100alriyadh.com
نشوف وين اعلى نتيجة تصويت وراح تكون الخيارات محدده عشان لا يجينا احد يتميلح ويقول ابغى جو رومانسي >ويش اسوي له انزل ورد من السما هو وخشته .
يعني بتكون كذا :
باريسي
خليجي>عشان لا احد يقول اني عميل ولاّ منسلخ من مدري وشو .
استوائي
شمال اوسطي >مدري من فين جات :)
آسيوي
اوروبي

ما عليكم الا التصويت لجوكم الشهر الجاي وتشوفونه حقيقة قدام عيونكم .
لكن الله يهدي الوليد بن طلال ومجموعة الفيصلية ورطوونا شوي بهالبرجين اضطرينا نرفع السقف زيادة وكلفنا مبلغ كبير وترى كان بإمكاني اني اخليهم خارج المحمية بس فيها محلات تعجبني والشباب كسروا خاطري وين يروحون ؟؟

عالعموم هذا حلي عشان اقدر اقول فعلاً ( قلبي تولّع بالرياض ..حبٍ ورثته من الجدود )

ودمتم