من قدرك بالدعوة فعزه بالمجيء

هذا هو ما لم اجد بد من فعله عندما وجهت لي دعوة خاصة وغالية بنفس الوقت لزيارة قطر الجميلة...التي تفاجئت برؤيتها فعلاُ ..

كانت زيارة سريعة وليوم واحد بدأت صباح يوم الاثنين 27 ابريل 2009 عبر منفذ السلوى <<طبعا الحبيب يعشق سفر البر والحمد لله ما كان فيه زحمة في المنفذ خلصت في اقل من ربع ساعة ومسكت الخط السريع اللي ما فيه كميرا رادار الاّ وصورتني ^_^ وفي اثناء سيري جائتني رسالة من المعزب يقول غرفتك محجوزة في فندق الريتز كالرتون الدوحه وطلاقي بالثلاث ما تدفع ريااال وبما أن ابغض الحلال عند الله الطلاق فوافقت *_^

بس كان موعد الدخول الساعة 3 العصر فأقترح علي ان آخذ لفة في السنتر ستي لحد ما تجي 3 ومع اني اكره المولات ما لقيت قدامي الا اقبل اقتراحه خصوصا ان الدنيا كانت حر شوي فتوجهت للسنتر ستي ودخلته....

وتقهويت في ستار بكس وبعدها لفت انتباهي صاله التزلج اللي في بهو المول وبغيت انقز فيها بس تذكرت اني لابس زبيريه وهي تزحلق بي على طول الخط فأكتفيت بالزحلقة المجانية ^_^ بعدها توجهت صوب السينما بس تدرون لازم الواحد يعبي الكرشة قبل ما يخش السينما وانا على لحم بطني فضربت ذيك الغدوة اللي يحبها قلبكم ودخلت السنما واخترت الفلم اللي جاهز للعرض وكان4 FAST & FURIOUS قلت يلا مش بطّال خشيت الصاله وعينك ما تشوف إلا النووور انواع التقحيص اذني صاحت على وقالت : ياخي وش مسوية لك قلت : اهجدي لا افركك ، قالت : طيب

السلم هذا تمنيت فيصل معي العبه عليه <<<بدوي

بعدها ناظرت للساعة ولقيتها حول 3 وناظرت لثوبي وحالتي لقيتها تقول : لبيه يالدش والنظافة فقلت : ابشري الحين انقز للريتز كالرتون ولا يصير خاطرك إلاّ طيب وفعلاُ توجهت تلبية لها وبمعاونة من معزبي اللي كان على التلفون معي لحظة بلحظة ودلني للفندق لين خشيته وطبعاُ وش اول شيء يسويه واحد جاي من السفر ويخش لفندق ؟ اكيد يقشع هدومه ويتوجه للبانيو ...خذت ذاك الدش اللي روقني وعطاني انتعاش ولبست وخرجت من الفندق وتوجهت للكورنيش...ويا زينه من كورنيش رايق بصراحه واهل قطر اتوقع كلهم عليه..

يا زين الاشارات

طبعا لو لا الله ثم اقتراحات وتوجيهات معزبي كان توهقت.... فعلاُ ما قصّر وياي ...اقترح مجددا ان اروح لسوق واقف وهو عبارة عن سوق شعبي تصميمه فريد من نوعه وقديم يذكرني بالعهد العثماني ، يضم فيه اسواق شعبية ومقاهي ومطاعم ما ودك تطلع منه ابد ابد فقبل المغرب توجهت له وركنت سيارتي بعد ما دخت السبع دوخات على موقف ورحت لمقهى وطلعت للدور الثاني وقعدت وطلبت لي قهوة وجلست اناظر الكورنيش اللي يطل عليه وانا ظر العالم اللي مثل النمل من كثرهم بصراحه كانت الجلسة آآآخر روقان خصوصا اني قمت اسولف مع الناس اللي في المقهى واهم واحد العامل المصري دمه شربات وخلاني عشان دمه الشربات انق 200 ريال من غير ما احس ...

هذا عسكري ذكرني بجنود الحرس الوطني ^_^

هذي نوعية المقاهي في سوق واقف
إلاّ ليش سموه سوق واقف ؟؟!!!

في المساء منظر السوق روعه

خرجت من السوق على العشاء وتوجهت لفيلاجو واللي ما يعرفه هو سوق من طابق واحد فيه محلات من ارقى الماركات ويمر فيه بحيره اصطناعية وسقفه مغطى وملون بلون السماء الزرقاء والسحب البيضاء بصراحه تدخله تنسى نفسك<<<وصف دقيق بسم الله علي وكعادتي اول ما اخش مول وهي قليله افر فره سريعة واصفط في ازين كوفي وبعدها ابدأ في التخطيط وش اسوي في المول ..صفطت في كوفي <<<تريلا مو آدمي وناظر يمين الا فيه محل ملابس اطفال ما اذكر اسمه قلت: وجبت يستاهل فيصل وانقز له وادوخ العامل معي نزل نصف الملابس عشاني ..اشتريت كم طقم لفلذة كبدي <<يا حبي لهالجملة ورجعت مرة ثانية للكوفي وخلال جلستي فيه جاني المعزب ولا طول عندي لإنشغاله <<حشى وزير الداخلية ...بعدها رحت لمطعم آشاز الهندي وكسعودي طلبت برياني وآيس تي بفاكهة الباشن والزنجبيل << ابوك يالمزاج والحطها في دقايق ومن قوة حرارة البرياني طلبت آيس كريم وقمت ابرد لساني به وبعدها طلعت ...

بعدها توجهت لحديقة اسباير زون وهي ملاصقة للفيلاجو والاستاد اللي اقيمت فيه اولمبياد قطر مدري كم ^_^ وهي حديقة عامة يغطيها الثيل ومزينة بالاشجار اللي نقلت من انحاء العالم وفيها بحيره كبيرة يتوسطها جسر ونافورة ..الحديقة غطت على الهايد بارك لا جمالاُ ولا تنظيماُ ولا عناية مزوده بارصفة للمشي وملاعب بجد مبهرة و في المساء عالم ثاني تلاقي اضاءة خافته تعطيك جو رومانسي <<يا كثر بربرتك هات الصور

بعد اللفه هذي كلها اللي انتهت 11 بالليل صرت ادور للفراش رجعت للفندق وطقطقت شوية عالنت وخمدتها نومه ما وعيت الاّ الساعة 5 الصبح <<ايام الدوام اقوم بمطااقة الساعة 8 ثم قمت واخذت دش وكشخت وتوجهت لمطعم الفندق افطر ...

بعدها عطيتك للفندق وحديقته نظرة المسافر ورجعت للغرفة ولميت قشي استعداداُ للتشيك آوت و خرجت من الفندق وانا حزين *_*

وبعدها جا في نفسي فنجال قهوة في الفيلاجو ورحت له وتقهويت وسولفت مع واحد لقيته هناك وطلعت ومريت بعدها الاسباير زون ونظرة وداع برضو ومشيت وحسيت ان وجهي خفيف اثاريني نسيت نظارتي في الكوفي لكن فدا لقطر ...مشيت الطريق وانا خطوة قدام وعشر ورا ما ودي اروح لكن الجايات أكثر ...

أخيراُ كلمة شكر لمعزبي وياليت يشرفني بزيارته للسعودية واكأفيء احسانه واقوله فديتك يا غناتي .

ملاحظة : انا صورت بكميرا الجوال ولكن جودتها مو لهناك ففضلت ان استعين بصور من النت .